Ei ung kvinne kjem til Birdcage Inn, eit hotell nær ei strand som har blitt stengt grunna ureining. Med seg ber ho ei lita veske og ein stor reproduksjon av eit av ekspresjonisten Egon Schiele sine forvrengte, erotiske måleri. Ho har blitt leigd inn for å tilfredsstille hotellet sine sporadiske nattlege kundar og tjene til livets opphald både for seg sjølv og hotelleigaren sin familie. Faren og sonen i huset nøler ikkje med sjølv å nytte seg av tenestene hennar, og dette berre intensiverer forakta hotelleigaren si dotter kjenner for henne. Ho skjems over måten familien får inntekta si ifrå, og skjuler livstilen deira for mannen ho er trulova med. Så ei natt ligg også den komande ektemannen over hjå den prostituerte, ei hending som vert starten til ei stadig djupare forståing dei to kvinnene imellom. Bølgene som slår inn på den nærliggjande stranda gjenspeglar den narrative rytmen i ein pittoresk film om to kvinner som finn saman i ei felles forståing av deira seksualitet.